X-LOVE (SOPAS' Diaries)

photo credits: Angelo FAN-https://www.facebook.com/angelo.xfanx

Tunay nga namang madami kang mahahagilap na samu’t-sari ng kwento at eksena kapag ikaw ay nagbibyahe.

Mas maganda siguro kung gumawa ako ng sarili kong version ng “Motorcycle Diaries”

Tatawagin ko itong “Sopas’ Jeepney Diaries.”

Pinababa ni Manong Driver ang isang estudyante ng high school ng kalapit kong pinagtatrabuhan.

Tinanong kasi n’ya ang bata kung magbabayad ng pamasahe.

Hindi na ito sumagot ng sinabihan s’ya ng driver na bumaba na ng kanyang sasakyan.

Noon ay katabi ko ang isang ginang ng tahanan na naghihimay ng binili n’yang papaya para daw kanyang pang-atsara.

Ginawa na n ‘ya yun sa loob ng sasakyan para pampalipas oras habang umaandar ang jeep.

Ganito ang aming naging usapan:

Ginang: Neng, bakit pinababa ang bata?

Ako: “Hindi daw po nagbabayad ng pamasahe.”

Ginang: “Paano naman n’ya nalaman na hindi nagbabayad ng pamasahe?”

Ako: “Baka po tanda na  ng driver, tapos ngayon ay hindi na nakatiis at sinita.”

Ginang: “Naku, kawawa naman. Paano na nga lang kung wala talagang baon?”

Sobra naman ang driver. Baka yun ay maglakad na lang pakanila. Pwede namang ilibre na lang.

Ako: “Hindi ko po alam. Pero maigi na din po na ginawa yun ng driver.”

Maigi na po yung tinuturuan ang bata na huwag magnakaw para paglaki n’ya ay hindi n’ya ugaliin.

Doon ho nagsisimula ang maliliit na pangungurakot eh.

Sumang-ayon naman ang ale.

SOFAST critique:

Naiintindihan ko na   malambot na puso ng Ginang.

Isa s’yang ina at natural sa kanya ang pusong maunawain.

Ngunit dahil ako naman ay dalaga, maaring ngang hindi ko maiintindihan kung bakit s’ya ganoon mag-isip.

Marahas ang driver.

Masama sa pakiramdam ang mapahiya.

Subalit mabuti na din ‘yun.

Sa ganoong paraan ay nlalaman n’ya na mali ang kanyang ginagawa dahil iyon ay isang uri ng pagnanakaw.

Dagdag pa doon ay isang kasalanan din ito ng pagsisinungaling.

Nakakaawa nga ang bata dahil pinababa s’ya ng jeepney.

Nakakaawa dahil maari nga s’yang maglakad pauwi ngunit may pagpipilian pa s’ya para huwag masita ni Manong Driver

Pwede s’yang makiusap ngunit hindi n’ya ito ginawa.

Sa halip ngumiti na lang s’ya at dali-daling bumaba.

Ang mga malalaking sakit ng lipunan ay nagsisimula sa mga “small time” na panloloko.

Mabuti ng tinuturuan ang mga bata ng tamang-asal bago pa man sila lumala at maging problema ng lipunan.

Malas mo lang bata at malupit si Manong Driver.

Swerte mo din at kinaawaan ka ng ale.

Ngunit mas maswerte ka dahil ang pagsita sa iyo ng Manong driver ay magtutulak sa iyo na gumawa ng mabuti.

Minsan ay hindi ko maintindihan ang pagmamahal.

Pikit-mata mong tatanggapin at hahayaan ang maling asal.

Magiging magulang din ako.

Sana hindi mangibabaw saken ang pusong mamon.

Magiging magulang din ako.

Sana magkaroon ako ng tama at pantay na pagmamahal

Magiging magulang TAYO.

Sana huwag nating kunsintihin ang maling ginagawa ng ating anak.

Nasa tao ang gawa.

Ngunit kapag nasa magulang ang Awa, anak ay mas lalong magiging kawawa.

Anak din ako.

Gagawa din ako ng mali.

Sana maging maunawain ang magulang ko.

Sana maging mabuti ako.