Ang puso ay walang amor sa kasayahan na iniaalok mo.
Sa puso ay walang puwang ang pagbubunyi.
Pulos sugat at peklat ng araw-araw.
Lasong lumalamon sa buong katinuan.
Hayaang magkaroon ng delubyo.
Pusong pagal ang magsisilbing kalasag sa bawat sibat na ipinupukol ng mundo.
Sasabog ang liwanag kapalit ay kalungkutan.
Ang dapit-hapon tulad ng manininingning na ilaw
Na pupukaw sa pusong nahahabag.
Matinik at madawag ang gubat ng paghihintay.
Walang kapanatagan.
Walang tiyak na liwanag.
Baging ng pag-asa tanging aaliw sa kaluluwa ng hapis.
Kadena ang iyong alaala.
Bangungot ka sa bawat paghinga.
Magtungo ka na sa kung saan ka dapat mahimlay.
Iaabot ang kamay.
Idampi ang hangin ng langit.
Sa paraiso na inaasam, doon ang katahimikan.
Tulungang umahon sa bangin.
